Barangay kagawad, BHWs kag mga tanod sang Barangay Inzo Arnaldo,mabaton na ang ila honorarium kag benepisyo sa masunod nga semana

ROXAS CITY -Ginkumpirma sang isa ka barangay kagawad sang Barangay Inzo Arnaldo Village nga sa masunod nga semana, ila na mabaton ang sweldo nga wala nila makuha sa sulod sang isa ka tuig.

Ginpahayag ni Kagawad Rommel Balguma kasunod sang pagpungko ni 1^st kagawad Ervin Sicad bilang punong barangay tal-us sa ginsuspende nga si Kapitan Einstein Okpora ang pagpatigayon sang sinapol kaupod ang mga BHWs kag mga tanod sa barangay sa diin gin-estoryahan ang pila ka mga isyu kalakip ang function sang kada isa.

Gilayon man nga ginhikutar ang ila honoraria agud mabaton na nila ini sa masunod nga semana.

Kalakip man sa makabaton sang honoraria si Okpora nga nagserbisyo man sadto.

Isa pa ka maayo nga development nga ginpalayag ni Balguma ang pagbalik na sang kuryente, matapos nga ila ginbayaran ang ila nga electric bill.

Samtang padayon man ang pagproseso sa ila nga water bill agud magbalik ang linya sang tubig.