Kinontra ni Risa Hontiveros ang pahayag ni Robin Padilla may kaangtanan sa “force majeure” nga posible mahimo nga basehan para tugutan ang online ukon remote participation sang mga senador sa plenary session sang Senado.
Ini matapos ginbanggit ni Padilla ang nagapadayon nga inaway sa Middle East, hulga sang terorismo kag ang posible nga pagkasangkot sang Pilipinas sa tensyon sa tunga sang China kag Taiwan bilang mga ehemplo sang “force majeure.”
Suno kay Hontiveros, wala ini nagaangay nga kabigon bilang force majeure. Ginpahayag man sini nga ang mga amo nga isyu mas nagakinahanglan nga personal nga atubangon kag trabahuon sang mga senador sa Senado.
Gin-athag man sang senadora nga base sa Senate Rules, ginatugutan lamang ang videoconferencing ukon online participation kon may force majeure ukon national emergency pareho sang natabo sang panahon sang pandemya.
Ang isyu may kaangtanan sa ginaduso nga pagbag-o sa Senate rules nga magatugot sa mga senador nga makatambong sa sesyon paagi sa teleconference ukon video conference.
