Ginpanindugan naman ni Senator Risa Hontiveros nga indi dapat magluntad ang pagbinaisay sa tunga sang mga senador kag ni Vice President Sara Duterte kun magtambong ini sa plenary deliberations sang Senado para sa proposed 2027 budget sang Office of the Vice President ukon OVP.
Suno kay Hontiveros, ginalauman nila nga personal nga magapakita ang bise presidente agud depensahan ang ginahingyo nga pondo sang iya talatapan, kasubong sang ginahimo sang mga pinuno sang iban pa nga ahensya sang gobyerno.
Madumduman nga wala nakatambong si Duterte sa hearing sang Senate Finance Subcommittee sang Oktubre 20 sa diin gin-aprubahan ang ginaduso nga 785.2 million pesos nga budget sang OVP kag sa baylo ginrepresentar siya ni Chief of Staff Atty. Zuleika Lopez.
Ginhatagan pagtamod ni Hontiveros nga kun indi na siya magtambong liwat, i-record nila ang kasubong nga tikang bangud indi nagakabagay nga indi mag-atubang sa personal ang isa ka opisyal agud ipaathag ang pondo nga iya ginahingyo sa Kongreso.
Ginklaro man sang senador nga wala sang sub judice rule nga malapas kon magtambong si Duterte sa budget deliberations bangud separado ini nga proseso sa impeachment proceedings, samtang suno sa iya, katungdanan sang Kongreso nga imbestigaran ang paggamit sang kwarta sang pumuluyo.
