Gindeklara sang House Committee on Justice nga ‘sufficient in grounds’ ang ikatatlo kag ikaapat nga impeachment complaints batok kay Vice President Sara Duterte nga nagahatag sang dalan para sa pagsugod sang hearing sa masunod nga semana.
Suno sa House panel, wala direkta nga ginsabat ni VP Sara ang mga alegasyon batok sa iya sa iya “Answer Ad Cautelam,” nga gin-file bilang sabat sa mga reklamo.
Ang duha ka mga reklamo sa impeachment ang nagaunod sang mga alegasyon batok kay Duterte kaangay sang betrayal of public trust, culpable violation of the Constitution, kag iban pa, may kaangtanan sa ginapahayag pag-abuso sang P612.5 million nga confidential funds kag pagpamahog sa kabuhi ni President Ferdinand Marcos Jr kag sang iya pamilya.
Suno kay House Deputy Minority Leader nga si Leila de Lima, ang sabat ni Duterte wala nagasanto sa mga alegasyon. Wala man sang paathag angut sa malversation sang pondo, anomalous disbursements, ukon ang mga sobre nga ginpanagtag sa pila ka mga opisyal sang Department of Education.
Bangud sini, mahimo na nga padayunon sang komitiba ang impeachment hearing proper, sa diin paga-istoryahan kag repasuhon ang mga ebidensya kag testimonya sang duha ka mga tagreklamo kag ni VP Sara.
Antes ang pagboto, una nga gin-athag sang House justice panel chair kag ni Batangas Second District Rep. Gerville Luistro nga seryoso ang mga alegasyon kag nagakinahanglan sang konkreto nga sabat.
Dugang pa sini, magasugod ang pormal nga hearing sa Marso 25, 2026.
Samtang, gin-aprubahan sang Kamara ang isa ka resolusyon nga magatugot sa komitiba nga padayunon ang impeachment hearings bisan sa tion sang recess.
Ginpahayag sini nga ang sesyon sang Kamara kag Senado ang suspendido halin Marso 21 tubtob Mayo 3, 2026.
