Nagdesisyon ang House Committee on Justice nga may bastante nga substance ang third kag fourth impeachment complaints batok kay Vice President Sara Duterte.
Sa ginpatigayon na botohan, 54 ang nagbutopabor, 1 ang negative, kag 0 ang abstentions, sa diin si Quezon City Rep. Jesus “Bong” Suntay lang ang nagboto sang “no.”
Ang desisyon ang nagahatag sang dalan para sa mas madalom nga paghinun-anon sa mga alegasyon batok kay Sara, lakip na ang ginaalegar plunder, graft, misuse of funds, kag pamahog nga pagpatay.
Apang sa baylo nga magtutok sa hearing, masako ang bise presidente sa pagpasaka sang kaso nga perjury batok kay Ramil Madriaga sa Taguig City Prosecutor’s Office.
Suno kay Duterte, nagpakilala nga campaign supporter si Madriaga nga akusado sa kaso nga kidnapping antes nagpakita bilang testigo sa kaso nga impeachment batok sa iya.
Matandaan nga si Madriaga isa ka former staff sang Office of the Vice President nga sang ulihi nagsumite sang affidavit nga naga-alegar nga ang kampanya ni Duterte ginpondohan sang mga drug dealers kag Philippine Offshore Gaming Operators (POGOs).
Ang testimonya sini ang isa sa mga ginsumite nga dokumento sa ikatlo nga impeachment complaints.
Ginpanindugan ni Duterte, indi mahimo nga madaya ang publiko sa imbento nga mga istorya, kag ang iya abogado nga si Atty. Paolo Panelo Jr. Magaatubang sa media agud sabton ang mga pamangkot may kaangtanan sa kaso.
