Nagpadala sang notice ang House Committee on Justice sa ila mga miyembro angut sa pag-umpisa sang preliminary deliberations sa apat ka verified impeachment complaints batok kay Vice President Sara Duterte.
Nasaad sa 3 ka notice nga ginpakigbahin ni ACT Teachers Party-list Representative Antonio Tinio ang agenda para sa tatlo ka adlaw nga deliberasyon humalin Lunes, Marso 2 tubtub Miyerkules, Marso 4 nga magasugod kada alas 10:00 sang aga.
Sa una nga adlaw sang deliberations, pagahiwaton ang initial consideration sa apat ka impeachment complaints batuk kay Sara.
Lakip ang una nga reklamo sa impeachment nga gin-file ni France Castro et al nga gin-endorso nanday Reps. Tinio, Sara Elago kag Renee Co.
Ang ikaduha nga reklamo nga ginpasaka ni Francis Dee et al, ang gin-endorso nanday Reps. Percival Cendaña kag Leila de Lima.
Samtang, ang ikatatlo nga reklamo sa impeachment ang gin-file nanday Rev. Joel Sabalia et al, nga gin-endorso ni Rep. Leila de Lima kag ang ika-apat nga reklamo sa impeachment nga ginpasaka ni Atty. Nathaniel Cabrera et al, nga gin-endorso nanday Reps. Bienvenido Abante Jr. kag Paolo Ortega V.
