Plano sang Department of Social Welfare and Development (DSWD) nga ilakip sa mga benepisyaryo sang 4Ps ang mga house helper, janitor kag security guards.
Ginpahayag ni DSWD spokesperson Irene Dumlao, kabahin ini sang enhancement nga himuon sang DSWD sa 4Ps nga may 17 na ka tuig ang implementasyon.
Suno kay Dumlao, kinahanglan lamang nga sila ang yara sa below threshold ukon nagasweldo sang tubtob P8,000 kada bulan kag may magagmay nga anak ukon yara sa zero age tubtob 18 years old nga ginapa-eskwela.
Dugang pa sang natungdan, bukas ang DSWD sa anuman nga enhancement sa implementasyon sang 4Ps kasubong sang suhestyon ni former DSWD secretary kag Senador Erwin Tulfo nag nagpahayag nga himuon nga one time bigtime livelihood grants ang ihatag sa mga benepisyaryo sang 4Ps kaysa Conditional Cash Grants.
Sa karon, padayon ang paghinun-anon sang Senado kag Kongreso para sa posible nga amendments sa programa sandig sa 4Ps Law.
Ginpahayag naman ni Gemma Gabuya, National Program director sang 4Ps, yara sa 3 million ang benepisyaryo sang programa as of July 2025 samtang yara na sa 1.4-Million ang naka-graduate ukon nag-exit na sa programa matapos madetermina sang mga social workers nga self sufficient na ang mga ini ukon may ikasarang na nga buhion ang pamilya.
