Tama ang nangin desisyon ni Presidente Ferdinand “Bongbong” Marcos Jr.nga ipasara ang mga Philippine Offshore Gaming Operators (POGO), nga ginasangkot sa mga sindikato sang iligal nga droga, kag mga kaso sang extrajudicial killings, nga naga-banta sa seguridad kag katawhay sang pungsod, suno kay Deputy Speaker David “Jayjay” Suarez.
Sa hearing sang Quad Committee sang Kamara de Representantes, nagaguwa nga may isa ka malawak nga sindikato nga ginapahayag nga ginapamunuan sang anay presidential adviser ni Presidente Rodrigo Roa Duterte nga si Michael Yang kaupod ang negosyante nga si Allan Lim.
Ang sindikato nga ini ang sangkot sa nagkalain-lain nga kriminal nga aktibidad humalin sa pagduso sang droga, money laundering, tubtob sa pagpadalagan sang mga iligal nga POGO nga ginahimo nga kasabwat ang mga corrupt nga opisyal sang gobyerno.
Sa hearing, ginpresenta nanday Suarez kag Senior Deputy Speaker Aurelio “Dong” Gonzales Jr. ang isa ka detalyado nga matrix nga nagapakita kun paano ginpamunuan nanday Yang kag Lim, kaupod ang ila mga kapwa Chinese, ang yara sa likod sang isa ka malawak nga criminal network.
Dugang pa ni Suarez, nabal-an sa mga hearing ang mas madalom nga relasyon sang operasyon sang POGO sa mga kriminal nga aktibidad, nga yara sa likod sang lehitimo nga gaming operations, gatambak ang mga iligal nga aktibidad kasubong sang human trafficking, money laundering, kag mga krimen nga may kinaangtanan sa droga.
Ginpunto man sang mamalidha ang ginakahadlokal nga pagdamo sang mga extrajudicial killings nga konektado sa iligal nga industriya sang POGO.
Ginmensyonar pa sini nga apisar nga may tikang na nga ginhiwat ang gobyerno agud iparado ang mga operasyon sang POGO, indi dapat mag-untat ang pagkontra sa mga nasambit nga iligal nga aktibidad.
Nagpanawagan man si Suarez para sa mas strikto nga pagpatuman sang layi kag mga reporma sa polisiya agud mapunggan ang pagbalik sang mga kasubong nga operasyon sa mga masunod nga tinuig.
Ginpasalamatan man ni Suarez ang ginahiwat nga imbestigasyon sang Quad Comm, nga may dako nga parte sa pag-usisa sang amo nga problema.
