ROXAS CITY – Padayon sa paglibot ang mga bus nga nagaserbi nga mobile warming centers agud magserbi nga temporaryo nga ilistaran ilabi na sang mga homeless people sa pila ka mga estado sang Amerika nga apektado sang polar vortex ukon tuman ka lamig nga panahon.
Ini ang ginpahayag ni Bombo International Correspondent Mr. Raffy Fernando, tumandok sang Capiz kag masobra 12 ka tuig na nga nabase sa Indiana, USA sang mainterview sang Bombo Radyo.
Mahibaluan nga magluwas pa sa mga mobile warming centers, nagbukas man sang mga warming centers sa pila ka mga rehiyon kun sa diin mangin ang mga police stations ang bukas man sa mga pumuluyo nga wala sang makadtuan.
Mahibaluan nga may mga narekord naman nga napatay bangud sa padayon nga pagpanalasa sang winter sa US midwest tuga sang polar vortex.
Ma-eksperyensiyahan ang ‘arctic weather’ sa Estados Unidos kun sa diin ang temperatura sa Chicago ang nagnubo na sa below freezing temperature.
Ang nasambit nga temperatura ang mas malamig pa sa pila ka porsyon sang Antarctica.
Gindeklarar na ang states of emergency sa Midwestern Wisconsin, Michigan, kag Illinois kag mangin sa Alabama kag Mississipi nga masami mainit ang panahon.
Mahibaluan nga nagpaguha naman sang windchill warning ang federal government kun sa diin ginpanugyanan ang mga residente nga likawan ang pagguha sa ila nga balay agud makalikaw sa anuman nga disgrasya.
