Boluntaryo nga nag-atubang sa hearing sang Independent Commission for Infrastructure (ICI) si House Majority Leader Sandro Marcos may kaangtanan sa ginaalegar iregularidad sa flood control projects.
Suno kay Marcos, wala siya ginpadal-an sang subpoena kag nagtambong siya agud magbulig sa imbestigasyon sang komisyon.
Dugang pa niya, handa siya sa pagsabat sang tanan nga mga pamangkot kag paghatag sang bisan ano nga impormasyon nga makabulig sa pagpaathag sang isyu.
Samtang, naghingyo ang iya kampo sang executive session, nga gilayon nga ginhatag ni ICI Chairman Andres Reyes Jr.
Nahibaluan nga ang pagpakita ni Marcos ang may kaangtanan sa alegasyon ni anay Ako Bicol Rep Zaldy Co nga may bilyon ka pesos nga budget insertions sa flood control projects humalin 2023 tubtub 2025.
Hugot naman nga ginpanginwala ni Marcos ang alegasyon kag ginpanindugan nga wala siya sang kahilabtanan sa anuman nga maanomaliya.
Padayon naman ang imbestigasyon sang ICI sa gina-alegar malapnagon nga korapsyon sa flood control projects sa nagkalain-lain nga rehiyon sang pungsod.
Ginalauman nga magapagwa sang rekomendasyon ang komisyon matapos makompleto ang testimonya sang mga opisyal nga gina-imbestigaran.
