Ginpabutyag ni House Minority Leader kag 4Ps Party-list Representative Marcelino Libanan ang iya kabalaka matapos ideklarar sang Korte Suprema nga Unconstitutional ang impeachment complaint batuk kay Vice Presidente Sara Duterte, nga iya ginlaragway bilang isa ka “judicial amendment of the Constitution.”
Sa iya privilege speech sa plenaryo sang Kamara sang Lunes, gin-akusar ni Libanan ang Korte Suprema sang paglapaw sa mandato sini paagi sa pag-impose sang mga rekisito sa impeachment process nga, suno sa iya, wala man nasulat sa Konstitusyon.
Suno pa sa iya, may papel ang hudikatura sa pag-interpretar sang mga layi kag Konstitusyon, pero indi ini dapat maglab-ot sa pagbag-o sang batásan.
Ginpunto man sang mambabatas nga ang ginpasulod nga mga bag-o nga rekisito sang Korte Suprema mahimo makahatag sang oportunidad sa “sabotage” sang impeachment process.
Ginpabutyag man ni Libanan ang posibilidad nga magamit ang ruling agud malikawan ang accountability.
Samtang, si SAGIP Party-list Representative Paolo Henry Marcoleta, sa isa ka demonstrasyon, nagpamangkot sa Kamara kon ngaa “ginsupak” sini ang pahayag sang Presidente.
Ginatumod sini ang pahayag ni Presidente Ferdinand Marcos Jr. sang Nobyembre, nga nagapamatuod nga nagpadala siya sang text message sa iya mga kaalyado sa lehislatura agud untaton ang pag-file sang impeachment complaint batok kay Vice President Sara Duterte, nga ginatawag ini nga “irrelevant.”
Nagpanawagan man ini sa iya mga kaupdanan sa lower house nga respetuhon ang desisyon sang Korte Suprema.
Ginhatagan pagtamod ni Libanan nga wala nagapakig-away ang Kamara sa Korte Suprema, kundi ginahimo sini ang ila constitutional duty.
Una na nga ginpanginwala sang mga lideres sang Kamara nga ang reklamo sa impeachment batuk kay Duterte may motibo sa pulitika, kag ginhatagan pagtamod nga ini ang nahanungod sa accountability sa ginaalegar indi husto nga paggamit sang confidential funds.
Apang, ginpanginwala naman ni Vice President Duterte ang mga alegasyon kag ginpahayag nga wala siya naglapas sa paggamit sang confidential funds.
Sa karon, may ginfile nga motion for reconsideration ang House of Representatives sa Korte Suprema agud baliskaron ang desisyon.
