Magaboto na subong nga adlaw ang miyembro Kamara batok kay Vice President Sara Duterte, agud kumpirmahon ang report sang House Committee on Justice nga nagapahayag nga may yara sang “probable cause” sa impeachment complaint batuk sa Bise Presidente.
Kasunod ini sang pila ka semana nga hearing kag pag-usisa sang mga dokumento kag ebidensya nga nagatuyo nga mapamatud-an ang mga alegasyon batok kay VP Sara.
Pagatalakayon man sa plenaryo ang committee report kag resolution nga amo ang magahatag sang alagyan para sa apat ka Articles of Impeachment nga ipadala sa Senado para sa trial.
Suno kay Justice panel chairperson kag Batangas Rep. Gerville Luistro, handa ang komitiba nga depensahan ang ila findings sa plenaryo agud makaangkon sang bastante nga boto.
Sa idalom sang Konstitusyon, kinahanglan ang 1/3 nga boto ukon 106 ka boto gikan sa 318 ka mga miyembro sang House of Representatives agud mapasar ang impeachment kag ipadala sa Senado nga magaserbe nga impeachment court.
Ang pagboto ang patigayunon paagi sa nominal voting, sa diin ang tagsa ka kongresista pagatawgon isa-isa agud magboto sang “huo” ukon “indi.”
Sa pihak sini, nagpaandam ang Partido Demokratiko Pilipino–Lakas ng Bayan (PDP Laban) nga indi sini pagbatunon sa ila partido ang sin-o man nga mamalidha nga magboto pabor sa impeachment sang bise presidente.
I-blacklist man ang mga ini kag indi na pagpahanugutan nga magpadalagan sa idalum ni PDP Laban sa masunod nga eleksyon.
