Nagasalig naman ang House prosecution panel nga mapresentar sa gihapon sang insakto ang isyu sang confidential funds ni VP Sara Duterte bisan pa nga indi pagtugutan nga ipresentar ang bank, tax, kag iban pa nga financial records ni Duterte.
Una nga naghingyo ang House panel sa impeachment court nga mag-isyu sang subpoena para sa financial records sang bise presidente nga ipresentar sa masunod nga semana.
Suno kay House prosecutor Rep. Bel Zamora, bastante na ang ebidensya sang House panel agud suportahan ang alegasyon sang iregularidad sa paggamit ni VP Sara sang iya confidential kag intelligence funds.
Apisar nga importante ang mga dokumento nga nagaunod sang bank kag financial records sang bise presidente, ginpahayag sini nga masarangan sang panel nga ma-establisar ukon maplastar ang mga pamatuod sang tanan nga mga alegasyon, bisan wala pa ginpaguwa ang kaundan sang kontrobersyal nga Bureau of Internal Revenue (BIR) box.
Ginalauman man nga magasugod sa masunod nga semana ang deliberasyon sa isyu angut sa confidential kag intelligence funds ni VP Duterte.
