Ginpakigbahin ni House trial spokesperson Zia Alonto Adiong nga ang impeachment trial ni Vice President Sara Duterte ang dapat magdeterminar kon bala matuod ukon indi si “Mary Grace Piattos,” isa sa mga ngalan nga nagaguwa sa kontrobersiya sang confidential funds.
Suno kay Adiong, isa ini sa mga importante nga isyu nga dapat klaruhon sa trial, ilabi na sa isyu sang acknowledgement receipts nga gin-alegar gingamit sa paggasto sang pondo.
Ginhatagan sini pagtamod nga base sa report sang Philippine Statistics Authority (PSA), wala sang birth, marriage, ukon anuman nga civil record nga nagatumod sa nasambit nga ngalan.
Ginpanindugan ni Adiong nga ang impeachment court ang husto nga lugar agud mahibaluan ang kamatuoran kag indi dapat magsalig sa espekulasyon.
Dugang pa sini nga kun nagapamilit ang depensa nga matuod si “Mary Grace Piattos”, mas maayo nga ibuyagyag kun sin-o siya sa korte agud lubos nga maklaro ang isyu.
