Handa ang House prosecution nga gamiton ang mga kopya sang Office of the Vice President ukon OVP sang liquidation reports agud malikawan ang pagdiskusyon sa authentication kag mapadasig ang impeachment proceedings.
Suno kay Atty. Benjamin “Jay” Tolosa Jr., spokesperson sang House prosecution, naghalin mismo sa OVP ang mga dokumento kag gin-submit sa Commission on Audit ukon COA.
Pahayag pa niya, mahimo nga ikumparar anay sang magtimbang nga bahin ang ila mga dokumento kag gamiton ang magkapareho nga records agud indi na balik-balik nga pamatud-an ang authenticity sang mga ini sa hearing.
Samtang ginalauman naman nga magapangatubang sang maid-id nga pagpangusisa sang prosecution sanday Gina Acosta kag Edward Fajarda nga nagserbe bilang Special Disbursing Officers sang OVP kag Department of Education ukon DepEd.
Dugang pa ni Tolosa, ginakabig sila nga hostile witnesses bangud mahimo nga indi compatible ang ila bahin sa interest sang prosecution.
Importante ang ila testimonya bangud sila mismo ang nagbaton sang cash halin sa confidential funds kag pagausisaon kon diin gindala kag gingamit ang pondo tubtob sa liquidation.
Mahimo man gamiton sang prosecution ang leading questions, samtang ang mga senador nga nagaserbe bilang judge ang magadesisyon sa kabug-aton sang ila testimonya kaupod sang bank records, liquidation documents kag findings sang COA.
