Nagapati ang isa ka abogado nga maayo ang presentasyon sang ebidensya sang House prosecution sa nagapadayon nga impeachment trial ni Vice President Sara Duterte.
Sa interview sang Bombo Radyo kay Atty. Rodel Taton, Dean sang Graduate School of Law sang San Sebastian College–Recoletos sa Manila, iya ginpahayag nga temprano pa agud hambalon kon sin-o gid ang nagapanguna ukon nakapuntos sa kaso.
Suno kay Taton, sa subong nga bahin sang impeachment trial, mas makita nga may bentaha ang prosecution bangud sa ila presentasyon sang mga ebidensya.
Ginpahayag man sini nga napamatud-an kag na-authenticate sang prosecution ang video nga ila ginapresentar bilang ebidensya sa kaso.
Dugang pa sang natungdan, wala pa siya may nakita sang nakaigo nga depensa agud maguba ukon madulaan sang kredibilidad ang amo nga ebidensya.
