Ginbag-o sang House prosecution panel ang assignment sang pila sini ka mga miyembro para sa ginalauman nga pagsugod sang impeachment trial batok kay Vice President Sara Duterte.
Suno kay Justice Committee chair kag lead prosecutor nga si Gerville Luistro, indi na siya magserbe bilang lider sang team nga maga-uyat sang pila ka mga reklamo nga ginhaboy kay VP Sara.
Sa baylo, magatutok siya sa iya papel bilang lead prosecutor.
Bangud sini, pangunahan ni Manila Representative Joel Chua ang team nga maga-uyat ukon magatutok sa reklamo tuhoy sa maanomaliya nga paggamit sang confidential kag intelligence funds.
Samtang, pamunoan naman ni Bukidnon Representative Keith Flores ang artikulo tuhoy sa gin-alegar pagsuhol ukon bribery nga natabo sang si VP Sara pa ang tiglikom sang Department of Education.
Sa subong, suno kay Luistro, ginatun-an sang mga prosecutor ang tanan nga mga isyu sa palibot sang tagsa ka articles of impeachment, lakip na ang regular nga mga pagsinapol kag mga workshop.
Ginalauman nga matapos na sa masunod nga semana ang 10 ka adlaw nga grace period nga ginhatag sa kampo ni VP Sara agud sabton ang mga alegasyon nga nakasulod sa impeachment case batok sa iya.
