Pormal na nga ginpakilala sang House Prosecution Panel ang una nga batch sang mga veteran private prosecutors nga mangin partners sa impeachment trial ni VP Sara Duterte sa senado.
Suno kay lead prosecutor Gerville Luistro, ang grupo ginabug-usan sang mga kilala nga mga abogado, anay opisyal sang gobyerno, kag legal experts nga nagboluntaryo nga magserbisyo nga wala sang bayad ukon pro bono.
Lakip sa ginpakilala nga mga abogado amo sanday former assistant presidential legal counsel Marforth T. Fua sang PECABAR Law, veteran trial lawyer Lorna Kapunan sang Kapunan and Castillo Law Offices, kag UP College of Law lecturer Amando Virgil Ligutan sang SALiGAL Law kag kaupod pa ang iban nga mga abogado gikan sa nagkalainlain nga mga law firm.
Suno kay Akbayan Party-list Rep. Chel Diokno, dako ang mabulig sang mga private lawyers sa pag-organisar sang mga ebidensya kag pagpreparar sang mga testigo nga ipresentar sa senado.
Gin-athag man sang House prosecution panel nga ang mga volunteer prosecutors ang magapabilin sa idalom sang ila direkta nga superbisyon, samtang ginalauman nga ipakilala sang Kamara ang masunod nga batch sang private prosecutors antes magsugod ang trial.
