Posible nga magahiwat sang regular press briefing ang House prosecution panel sa tion nga mag-umpisa na ang impeachment trial batok kay VP Sara Duterte.
Suno kay panel spokesperson Zia Alonto Adiong, ginatun-an na sang mga piskal ang posibilidad nga maghiwat sang kaangay nga briefing, bilang kabahin sang information campaign agud masanagan ang publiko sa mga proceedings.
Ang panel nagatinguha man nga malikawan ang anuman nga confusion sa mga legal nga isyu nga nagapalibot sa bug-os nga proseso.
Ginalauman sang panel nga mangin malawig ang serye sang mga hearing kag sigurado nga magatutok ang publiko sa bug-os nga trial.
Magluwas sa media, luyag man sang panel nga direkta nga mag-address sa publiko kag sabton ang ila mga palamangkutanon.
Sa subong, ginatun-an pa sang panel ang eksakto nga format sang mga briefing, kon sa diin luyag sang mga prosecutors nga maghatag sang regular update, paathag sa mga proseso, mga projection kag pag-uswag sang kaso, kag madamo pa.
Suno sa iya, nahibaluan sang mga prosecutors ang kasangkaron sang interes sang publiko kag luyag nila nga huptan ang amo nga interest sa bulig sang regular nga information dissemination.
