ROXAS CITY – Ginpadasig kag ginpahupos na ang pag-apply sang Housing loan program sang Pag-IBIG Fund.
Ini ang ginpahayag ni Mr. Wilmer Lirazan, Department Manager III, sang mainterview sang Bombo Radyo.
Suno diri, bukas ini sa mga aktibo nga member sang Pag-IBIG nga may 24 months savings pataas, indi magsobra sa 65-anyos sa adlaw sang aplikasyon, may kapasidad sa pagbayad, wala sang na-cancelled ukon na-foreclosed nga housing loan, kag good payer sa iban pa nga loans sa ahensya.
Mahimo suno diri makapili sang balay nga may maximum P6 million nga kantidad kag indi magsobra sa 30 katuig nga pagbayad.
Pagabasehan man suno diri kay Lirazan sa pagdetermine sa loanable amount sa Housing pinaagi sa income kada bulan sang borrower, aktwal nga kinahanglanon kag appraisal sang Pag-ibig Fund.
Sa tion nga indi masarangan sang borrower ang luyag nga loanable amount, ginapasugtan sang Pag-IBIG ang 2 ka mga co-borrowers agud malab-ot ang desired loan amount.
Apang, sa tion nga ma-alang-alangan sa pagbayad, may nagkalain-lain man nga loan restructuring progam nga ginatan-ay ang ahensya.
Ginapasumiter lamang ang luyag nga mag-avail, sang Housing loan application form, photocopy sang government issued I.D.’s kag income documents kaangay sang pay slip, certificate of employment, working contract kun isa ikaw ka OFW kag BIR Income tax Returns kun business man.
Pagkatapos sang aplikasyon, pagatawagan sang Pag-IBIG staff ang borrower sa estado sang iya rekisitos, kag sa sulod sang 90 calendar days, mahibaluan kun aprubado sang ahensya ang nasambit nga Housing loan.
Tumalagsahon man suno diri ang pag-deny sang Housing loan, magluwas lang kun bangud sa fraud.
Samtang, ginpaalinton ni Lizaran, nga diri sa Capiz may yara sang masobra 100 ka acquired assets ang ahensya, ini amu ang mga property nga na-foreclose ukon mga borrowers nga may delinquency sa pagbayad, nga bukas sila sa luyag magkuha sang amu nga propedad, kag patigayunon ang site visit sa masunod nga semana.
