ROXAS CITY – Gin-athag sang National Housing Authority ukon NHA nga indi mahimo nga mabaligya ukon maparentahan sang bepisyaryo sang pabahay ang ila housing unit.
Ini ang ginpahayag ni Dominica San Diego, District Manager sang NHA sang mainterview sang Bombo Radyo.
Suno kay San Diego nga hugot ini nga ginadumilian sang NHA bangud mahimo lamang ini mabaligya kun naglapaw na ini sa 20 katuig.
Dugang pa sini nga mahimo manabat ang sin-o man nga magbaligya sang ila housing unit nga wala sang pahanugot nagikan sa NHA.
Ini bangud sa tion nga mapamatud-an ini mahimo na nga indi na makaganar bisan san-o ang amo nga benepisyaryo sang pabahay kag mga benepisyo sang NHA.
Magluwas diri, ginkompirmar man sini nga wala sila nagabaton sang aplikasyon sang mga tawo nga luyag mag-apply sang housing unit bangud ang LGU’s diri ang nagalista kag ginahatag sa ahensya.
