ROXAS CITY -Padayon pa nga ginapangita sang Highway Patrol Group-Capiz (HPG)-Capiz ang 4 ka mga motorsiklo nga ginaalegar ginkawat sang wala pa matumod nga mga kawatan sa probinsiya sang Capiz.
Ini ang ginkompirmar sang Provincial Officer sang Highway Patrol Group-Capiz nga si Police Captain Peter Bergonio sang mainterview sang Bombo Radyo.
Ginpahayag ni Bergonio nga 16 tanan ka mga motorsiklo ang narecord nga ginkawat humalin sang bulan sang Enero tubtob Hunyo kun sa diin 12 diri ang natigayon na nga marekober sang mga kapulisan.
Ang pinakaulihi diri amo ang 6 ka mga motorsiklo nga narekober sa posesyon ni Alexander Sanchez nga nadakpan sa ginkasa nga entrapment operation sa banwa sang Pontevedra samtang ang 6 ka iban pa ang narekober matapos nga gin-abandonar sang mga wala matumod nga indibidwal.
Nagapadayon man ang follow-up investigation sang HPG-Capiz sa 4 ka mga motorsiklo nga tubtob subong wala pa marekober.
Ginkompirmar man ni Bergonio nga isa si Martinez sa mga ginamonitor sang HPG-Capiz nga imbolbado sa magkatuhay nga insidente sang motornapping sa probinsiya apang magluwas kay Martinez, may yara sang iban pa nga posible imbolbado sa iban nga kinawatay sang motorsiklo sa probinsiya.
Samtang ginkompirmar man ni Bergonio nga ginpasakaan na sang panumbongon si Martinez nga paglapas sa R.A. 10883 ukon New Anti-Carnapping Act of 2016.
