BAGUIO CITY – Pilason ang 14 ka mga indibidwal matapos gin-iksahan sang improvised explosive device (IED) ang isa ka tindahan sa Barangay Magsaysay, Baguio City.
Kita sa Closed-Circuit Television (CCTV) footage ang suspek nga ginsindihan ang IED antes ini nga gin-iksa sa tindahan nga nagtuga sang makusog nga pagsigabong kag pagkapilas sang pila ka mga pasahero nga nagahulat sang masakyan.
Sa imbestigasyon sang mga kapulisan, nahibaluan nga ginpahalin gikan sa tindahan ang suspek matapos ang ginaalegar pagpangbastos sa isa ka babaye kag masumbagan sang yara sa lugar. Nagpauli ini nga hubog kag sang nagbalik, may dala na nga IED.
Gilayon nga gin-aresto ang 32-anyos nga suspek nga isa ka minero halin sa Itogon, Benguet, samtang lima sa mga biktima ang nakagwa na sang ospital kag siyam pa ang padayon nga gina-obserbaran.
