ROXAS CITY – Dead on arrival ang isa ka 29-anyos nga driver sang motorsiklo matapos nga ginaalegar ginbungguan ang naka-parked nga tricycle sa Barangay Mongpong, Roxas City.
Ginkilala ang biktima nga si Jomar Sigarino sang Barangay Dapdapan, Sapian, Capiz.
Base sa inisyal nga imbestigasyon sang Roxas City PNP nga samtang ginasubay ni Sigarino ang nasambit nga dalanon hinali na lamang sini ginbungguan ang naka-parked nga tricycle sa kilid sang karsada nga ginapanag-iyahan ni Relly Arenajo 50-anyos sang Malipayon Village, Barangay Tiza sining siyudad.
Bangud diri, nag-angkon sang patal nga pilas sa ulo ang biktima samtang bukol naman sa ulo ang naangkon ni Arenajo bangud yara ini nagakatulog sa sulod sang nasambit nga tricycle sang natabo ang aksidente.
Nahibaluan nga yara sa idalom sang impluwensya sang makahulubog nga ilimnon si Sigarino sang nagluntad ang aksidente.
Gintingwaan pa sang Roxas City Emergency Response Team ukon RCERT nga dal-on sa ospital si Sigarino apang gindeklarar naman ini nga dead on arrival sang attending phycian.
Samtang, nagapadayon naman ang imbestigasyon sang mga kapulisan sa nagluntad nga aksidente.
