ROXAS CIY – Ginkustodiya sa Roxas Component City Police Station ang isa ka manugbaligya sang isda, matapos nga nagtuga sang kinagamo sa sulod sang fish section sang Teodoro Arcenas Trade Center (TATC), alas-11:45 sa aga, kahapon nga adlaw sang Huwebes, Agosto 4.
Ginkilala ang persona kay Alfredo Ariza, 56-anyos, balo, kag residente sang Washington St., Barangay VII, sini nga syudad.
Sandig sa ginpabalhag sang nag-aresto nga citizen nga ginkilala kay Lemuel Bodegas, TATC Consultant nga residente sang Brgy. Adlawan, sini nga syudad, yara sa impluwensiya sang makahulubog nga ilimnon si Ariza nga nagatuga sang gamo pinaagi sa paghaboy sang matig-a nga bagay sa tatlo ka mga himu sa stainless steel nga tapangko ukon lamesa sa isdaan, nga gintunaan sang pagka-gasgas sang mga ini.
Bangud diri, gin-aresto ni Bodegas ang fish vendor kag gindala sa mga kapulisan para sa nagakaigo nga disposisyon kag natalana nga pasakaan sang nagakaigo nga panumbungon.
