ROXAS CITY – Pilas sa agtang ang naangkon sang 38-anyos nga lalaki matapos ginlampusan sang botelya sang kapareho nga hubog samtang yara sa guwa sang binaylehan sa Barangay Cogon, Sigma, Capiz.
Ginkilala ang biktima kay Regy Daños, residente sang Brgy Timpas, Panitan samtang ang suspek amu si JR Santural, 33-anyos residente sang nasambit nga lugar.
Sandig sa impormasyon nagikan sa Sigma MPS, nagluntad ang indi pag-intinday sa tunga sang duha, ginapahayag nauna nga naglakat ang suspek apang ginsundan ini ni Daños kag ginaalegar gintapik sini si Santural.
Bangud sini, ginlampusan ni Santural sang bote sang makahulubog nga ilimnon ang biktima nga gintunaan sang iya pilas.
Gilayon nga gindapatan sang pagbulong ang biktima kag sa karon yara na sa estable nga kondisyon.
Gin-aresto naman ang suspek sang mga naka-duty nga katapo sang BPAT sa lugar.
Samtang, nagapadayon naman ang imbestigasyon sang kapulisan angut sa insidente.
