ROXAS CITY – Ginsulod sang hubog nga lalaki ang puluy-an sang isa ka pamilya sa Barangay Damayan banwa sang Sapian alas 3:15 sang magaaga kahapon sang Biyernes.
Ginkilala ang suspek kay Christopher Zamudio Eroy, 41-anyos samtang ang nagpabalhag nga biktima ang ginkilala kay Evangeline Depla Eroy, 43-anyos kag lunsay residente sang nasambit nga barangay.
Sa report nga nakuha gikan sa Sapian PNP, nakabaton sila sang tawag gikan kay Jimmy JR Barrio Depla, utod sang biktima kun sa diin ginpahayag nga may nagluntad nga trespassing sa ila balay.
Suno diri, samtang nagakatulog ang biktima nga si Evangeline sa sulod sang iya puluy-an, ginpukaw ini sang iya utod nga si Jimmy kag ginsiling may nakita siya nga lalaki nga nagahigda sa idalom sang katre sa sulod sang kwarto sang bata nga babayi ni Evangeline kaupod ang isa pa ka himata nga lunsay mga menor de edad.
Gilayon naman nga ginpadulongan sang biktima ang hulot kag diri nakumpirmar nga nagakatulog ang suspek sa idalom sang katre nga ginapatihan yara sa impluwensya sang makahulubog nga ilimnon.
Samtang, nakasulod ang suspek pinaagi sa pagbukas sang sliding window sang balay nga wala sang permiso sang tagbalay, wala naman ginpalakat sang magpamilya ang suspek tubtob nag-abot ang kapulisan kag gin-aresto ini.
Napasakaan naman sang kaso nga paglapapas sa Sec. 2, Art. 280 sang Revised Penal Code ukon “Qualified trespass to dwelling” kahapon nga adlaw ang suspek kag yara na sa kustodiya sang Sapian MPS.
