ROXAS CITY – Nadugangan ang numero sang napatay sa baha sa probinsiya sang Capiz.
Ginkilala ang pinakaulihi nga biktima nga si Jun Rey Tumabiene 25-anyos sang Barangay Tabuc Sur, Panit-an, Capiz.
Nagapauli na si Tumabiene kaupod ang abyan gikan sa ilimnan sang magdesisyon nga tabukon ang ulumhan nga ginabaha, apang posible nga pilapil ang iya nga natapakan rason nga nadala ini sa mabaskog nga ilig sang tubig baha.
Bangud indi makahibalo maglangoy ang abyan ni Tumabiene nagpangayo na lamang ini sang bulig sa mga katapu sang Municipal Disaster Risk Reduction and Management Office sa banwa sang Panit-an nga amo ang nakasagup sa biktima.
Gindala pa ini sa ospital apang gindeklara nga dead on arribal sang doktor.
Samtang ginatutukan sa karon sang Provincial Disaster Risk Reduction and Management Office sa pagpamuno sang action officer nga si Mr. Esperidion Speed Pelaez ang banwa sang Panit-an kag Pontevedra sa premier distrito sang probinsiya, bangud nagaserbe ini nga catch basin sa diin ginalauman na ang pagbulhog sang tubig baha gikan sa tubig baha gikan sa segundo distrito.
Nagpahanumdum man si Pelaez sa mga commuters nga may transaksiyon sa Roxas City nga may dump truck ang gobyerno nga magahatag sang libre nga sakay patabuk sa ginabaha nga karsada sa Barangay Agkilo sa banwa sang Panit-an.
