ROXAS CITY – Ginasiguro sang City Environment and Natural Resources nga mangin malinong kag malimpyo ang palibot kadungan sa selebrasyon sang Kaadlawan 2024.
Sa Interview sang Bombo Radyo kay Mr. Ronald Amigo, City Environment and Natural Resources – Officer, ginpahayag sini nga nakadeploy ang mga security personnel sa pagmonitor kag masiguro ang kalimpyo sa palibot.
Pahayag pa sini nga, nagpahamtang sila sang mga basurahan sa palibot, kag ginmeeting man nga mga vendors sa tagsa ka kiosk nga nagabaligya sang mga pagkaon nga e-secure nila ang ila basura.
Wala naman ini nagkulang sa pagpahanumdom sa mga pumuluyo nga likawan ang paghaboy sang basura sa kun diin agud indi mamultahan sa nagakaigo nga multa sa paglapas sang ordinansiya sang syudad.
Dugang pa ni Amigo nga nagalapta sa palibot ang mga security personnel agud dakpon kag ticketan kun sin-o man ang makit-an nga maghaboy sang basura kun sa diin lang.
Sa subong nga adlaw, may natalana naman nga event nga pahiwaton sa Barangay Baybay Roxas City,gani panugyan sini sa mga pumuluyo nga magatambong sa amo nga aktibidad, magbulig sa pag mentinar sang kalimpyo sa palibot.
