ROXAS CITY – Liwat nga nagpatuman sang hugot nga pagsulundan ang konseho sang Barangay Milibili matapos nahibaluan nga gikan sa ila lugar ang ikaanum nga nagpositibo sa COVID-19.
Ginpahayag ni Kagawad Celinee Azarcon nga kasunod sang impormasyon nga ila nabaton gilayon nga nagpatigayon sang sinapol ang konseho sang barangay, ginkordon kag gindis-infect ang area kag ginpaidalum sa rapid test ang pila ka mga indibidwal nga nakaangkon sang close contact sa positive COVID-19 patient.
Apang sang nagguwa nga negatibo ang resulta sang test, ginpaidalum sila sa 14-day house quarantine.
Kalakip man sa nangin aksyon sang konseho sang barangay ang pagrekorida nga nagahinyo sang kooperasyon sang mga pumuluyo nga kun mahimo magtenir sa ila mga balay.
Apang pananglitan nga magguwa sila, magsuksok lamang sang face mask bilang proteksyon.
Aminado man si Kagawad Azarcon nga madamo ang mga nagsarado sang ila mga balay bilang precautionary measure.
Talalupangdon man ang pagsarado sang mga tiyangge nga malapit sa balay sang public health worker, apang bukas man ang iban nga mga tiyangge nga malayo sa area.
Samtang magluwas diri suno sa opisyal nga hugot man ang ginapatuman nga checkpoint sa diin temporaryo nga ginsaraduhan ang pila ka mga alagyan agud indi makasulod-paguwa sa barangay.
Ginapaidalum man sa thermal scanning kag ginapangitaan sang quarantine ukon special quarantine pass ang nagasulod sa barangay.
