ROXAS CITY, CAPIZ- Nangin madinalag-on ang siyam ka mga estudyante nga nagpasimpalad sa ginpatigayon nga Certified Plant Mechanic Computer-Based Licensure Examination (CPMCBLE) sang bulan sang Agosto 2025.
Sa interview sang Bombo Radyo kanday Dave Vincent Alegre Top 3, Jhun Allen Corcoro, John Michael David, Jhun Mark Deocampo, Nico Nicolas, John Cedrick Olete, Ephraim Von Paclibar, Earl Noe Rudico, kag Liera Jane Villalva pareho nag-gradwar sa kurso nga Bachelor of Science in Mechanical Engineering sa Capiz State University sang 2025, ila ginpahayag nga kaangay nakibot ini sila sang nakapasar sila sa amo nga board exam sa diin tuman ini nila nga ginpasalamat sa Ginoo.
Dugang pa sang syam, indi man nangin madali para sa ila ang pagkuha sang exam, apang hugot ang ila nga pagpati nga kun para sa ila ang kadalag-an maskin ano ang matabo ihatag gid para sa ila.
Nahibaluan nga ang Certified Plant Mechanic Computer-Based Licensure Examination (CPMCBLE) isa ka importante nga tikang para sa mga aspiring Mechanical Engineers agud makuha ang lisensya kag makapanerbisyo sa ila nga sektor nga ginpili.
Samtang, nagpalab-ot naman ang syam sang pagpasalamat sa mga tawo nga nangin kabahin sang ila nga journey kag sa kadalag-an nga ila napagkit, ilabi na sa tagsa nila ka mga ginikanan sa suporta nga ginhatag sumugod nga sila ang nagaeskwela palang tubtob sa nangin propesyonal na.
In an interview with Bombo Francis Biñas & Bombo Sunnie Mae Batencila
