Hugot nga pagtuo sa Diyos kag sa kaugalingon, isa sa mga nangin yabi agud makapasar kag malab-ot ang handum sang kaugalingon kag pamilya.
Sa interview sang Bombo Radyo kay Charge Mendoza Vacaro, tumandok sang Barangay Pangabat, Jamindan, Capiz kag board passer sang 2025 Criminology Licensure Examination, iya ginpahayag nga sa ika-duha nga kahigayunan, kaangay nga indi ini makapati bangud nga ginhatag na sa iya ang iya madugay na nga ginapangayo sa diin amo ang mangin registered criminologist.
Suno kay Vacaro, ang kurso nga criminology ang iya gid sang desisyon nga kuhaon rason nga luyag nya gid sini nga mangin ganap nga pulis pamaagi sa paglab-ot sang lisensya.
Dugang pa niya, indi nangin mahapos ang iya nga mga naagyan agud malab-ot ang amo nga kadalag-an, sa diin nga nagtrabaho pa ini sa isa ka mall para lang makakuha sa liwat sang exam bangud sa una nga kahigayunan, napaslawan ini.
Pahayag pa ni Vacaro, ang amo nga kadalag-an ang ginadedikar nya indi lamang sa iya nga kaugalingon kundi sa iya big-os nga pamilya nga naghatag sang todo nga suporta.
Mensahe sini sa kaangay man nga estudyante kag magakuha sang exam, indi mag-untat sa paghandum, pagpangamuyo, magsalig sa ikasarang sang kaugalingon kag indi pagkalipatan nga atipanon ang kaugalingon.
Interviewed by Bombo Francis Biñas and Bombo Sunnie Mae Batencila
