ROXAS CITY – Ginklaro ni Mr. Joebert Carandang, Presidente sang Hugpong PISTON Capiz nga wala sang may matabo nga transport strike ukon pag-untat sang byahe sa mga pampubliko nga salakyan sa probinsya, kadungan sang patigayunon nga Barangay kag Sangguniang Kabataan Eleksyon (BSKE) sa palaabuton nga Oktobre 30, 2023 Lunes nga adlaw.
Suno kay Carandang, indi mag-upod ang HUGPONG Piston Capiz sa ginkasa nga pag-untat byahe sang transport group nga Manibela.
Pahayag sini nga wala sang kinahanglan nga kabalak-an ang mga pasahero sa adlaw sang pagpiniliay, bangud padayon ang ila pagbyahe.
Ginpakigbahin man ni Carandang nga tuman ang kalipay nga nabatyag sang mga drivers kag operators sa ginpatigayon nga big time rollback sa gatong sadtong tinalikdan nga semana.
Dako man suno diri ini nga bulig sa ila kag nakapiyan-piyan sa ila nga galastuan sa adlaw-adlaw nga pagbyahe.
Samtang, hugot naman nga ginakontra sini ang natalana nga pagphase-out sang mga moderno nga salakyan sa palaabuton nga Disyembre 31, kung sa diin tubtob na lamang diri natalana nga maga-operate ang ila hanay kag indi na paghatagan sang permit apisar nga may mga prangkisa ang mga ini kag permit to operate.
