ROXAS CITY – Makaalarma ang epekto sang Climate change kag Global warming kada tuig sa bug-os nga kalibutan.
Indi man tiliawan ang aton naeksperyensiyahan nga pabag-o bag-o sang klima kag kalamidad sa bug-os nga kalibutan, nga nagatuga sang pagkadula sang kabuhi, bangud sa climate change.
Sa interview sang Bombo Radyo kay Dr. Reynand Dumala-on, tumandok sang Sigma, Capiz, kag isa ka educator sa pungsod Taiwan, normal ang ginatawag nga climate change kag global warming, apang posible ini nga magalala kada tuig kun magpadayon nga pabaya kag iresponsable ang mga pumuluyo.
Ang pagdamo sang salakyan, pagpatindog sang mga factories kag pag-utod sang kahoy agud patindugan sang mga edipisyo, ini ang pila sa mga rason sang nagalala nga epekto sang climate change kag global warming sa kalibutan.
Kinahanglan suno diri nga maintindihan sang tawo ang ginatawag nga climate change agud mahimo sini nga maatipan ang iya palibot.
Nagapati ini nga may mahimo ang isa ka indibidwal ang ila parte agud mapahagan-hagan ang malain nga epekto sang panahon, isa na diri ang pagtanom sang madamo nga kahoy.
Importate suno diri nga iduso ang green technology sa mga buildings, classrooms kag bisan sa mga panimalay, bangud kun madamo ang oxygen gases, dako ang ma-contribute sini sa palibot.
Nagakinahanglan man suno kay Dumala-on nga mag-akto ang gobyerno agud maghagan-hagan ang climate change kag global warming, kaangay sa paghimo sang science and research based nga polisiya nga mahimo ipatuman sa mga pumuluyo.
