Ginpakamalaot sang mga human rights advocate ang ginaalegar ‘delaying tactics’ sang kampo ni Former President Rodrigo Duterte agud mapunggan ang hearing sa iya sa International Criminal Court (ICC).
Sa isa ka pahayag, ginpatpat sang Duterte Panagutin Network nga nakabase sa Europa nga indi na bag-o sa ila ang mga politiko nga nagagamit sang health problems agud makalikaw sa hearing kag pagkapreso.
Suno sa grupo, nagdesisyon na ang International Criminal Court (ICC) nga “fit” ang anay Presidente nga atubangon ang pre-trial proceedings.
Dugang pa sini, ang pagkwestyon sang kampo ni Duterte sa nasambit nga desisyon ang makabig nga bag-o nga taktika para palawigon pa ang nauntat nga justice process.
Nahibaluan nga nagpagwa sang pahayag ang grupo matapos nga nagpresentar ang lead counsel ni Duterte nga si Nicholas Kaufman sang duha ka bag-o nga apeal sa international tribunal, lakip diri ang apeal sa desisyon sang ICC Pre-Trial Chamber I nga nagdeklara nga ‘fit’ ang anay Presidente sa pagtambong sa pre-trial proceedings kag ang desisyon sang pre-trial judges nga nagamando sa padayon nga pagkapreso sini sa The Hague, Nertherlands.
