Nagapati ang human rights group nga Karapatan nga indi nagakabagay ang pahayag ni Vice President Sara Duterte angut sa mga biktima sang kaso nga crimes against humanity nga ginapangatubang ni FORMER President Rodrigo Duterte sa International Criminal Court (ICC).
Sa interview sang Bombo Radyo kay Raoul Manuel, National Council Member sang Karapatan, ginpahayag sini nga dapat maghalong ang Bise Presidente sa iya mga tinaga, ilabi na kun may kahilabtanan ini sa linibo ka mga pamilya nga nagasiling nga nadulaan sila mga pinalangga sa kampanya kontra iligal nga droga.
Suno kay Manuel, importante nga kilalahon kag respetuhon ang gina-agyan sang pamilya sang mga biktima samtang nagapadayon ang legal nga proseso sa ICC batuk sa anay Presidente.
Nagpanawagan man ang natungdan na ipabilin ang pagrespeto sa mga biktima kag dapat padayunon ang proseso sang accountability sa idalum sang kasuguan kag sang ICC.
