Nagpahayag sang hugot nga pagpamatok ang nagkalain-lain nga human rights groups kag indibidwal sa nakatalana nga paglubong kay anay Defense Minister Juan Ponce Enrile sa Libingan ng mga Bayani sa Taguig subong nga Sabado, Nobyembre 22. Pahayag nila, indi angayan si Enrile sa isa ka “hero’s burial” bangud sa mga paglapas sa kinamatarong sang tawo sadtong panahon sang Martial Law.
Suno sa Samahan ng mga Ex-Detainee Laban sa Detensyon at Aresto (SELDA), si Enrile nga nagtaliwan sang Nobyembre 13, ang responsable sa malapnagon nga pag-aresto, torture, pagpatay, kag pagkadula sang linibo nga mga biktima sang Marcos Sr. regime. Base sa datos sang Human Rights Victims Claimants Board, 11,103 ang ginkilala nga biktima sang pag pang-abuso umpisa 1972 tubtob 1986.
Hugot man nga gin-kondena sang iban pa nga sektor ang ginapahayag wala sang pag-ako sang salabton ni Enrile sa mga paglapas kag ang padayon sini nga pagpangunapin sa Martial Law. Suno sa ila nga pahayag, ang paglubong sa anay opisyal sa Libingan ng mga Bayani ang kaangay isa ka pangasa nga hulag sa agud balion ang kasaysayan kag magpadala sang mensahe nga “ang krimen ay may gantimpala.”
Samtang, gindayaw naman si Enrile sang pila sa iya nga mga kaupdanan kag tagsuporta, kalakip si President Ferdinand Marcos Jr., sa diin gintawag siya nga mautidtiron kag kabalo, kag nagserbe pa nga chief presidential legal counsel antes nga nagtaliwan.
Nahibaluan nga ang isyu ang liwat nga nagbukas sang mga panawagan batuk sa ginaalegar “whitewashing” sang mga nagkahinabo sadtong Martial Law, kaangay sang kontrobersyal nga paglubong kay Marcos Sr. sa pareho nga sementeryo sang 2016.
