Ginpanindugan sang isa ka human rights lawyer nga ang kaso nga ginapangatubang ni anay Presidente Rodrigo Roa Duterte sa International Criminal Court (ICC) dapat magserbe nga leksyon sa mga opisyal sang gobyerno, partikular angut sa paggamit sang poder samtang yara sa pwesto.
Sa interview sang Bombo Radyo kay Atty. Neri Colmenares, isa ka human rights lawyer, nga indi dapat pag-abusuhon sang mga opisyal sang gobyerno ang poder nga gintugyan sa ila.
Suno kay Colmenares, importante nga pasabton ang sin-o man nga opisyal nga mapamatud-an nga naglapas sa kasuguan, ano man ang iya pwesto sa gobyerno.
Gindugang sini nga isa man ini ka butang sang accountability, ilabi na nga madamo kuno ang nabiktima sang kampanya kontra iligal nga droga ukon war on drugs sa panahon sang administrasyon ni Duterte.
Matandaan nga natalana nga buksan sa Nobyembre 30, 2026 ang pagbista sa kaso ni Duterte sa ICC sa The Hague, Netherlands. Lakip sa mga kaso nga ginapangatubang sang anay presidente amo ang crimes against humanity of murder kag attempted murder.
Ginhatagan pagtamod sang natungdan nga dapat magserbe nga pahanumdom ang ini nga kaso nga wala sang dapat labaw sa kasuguan kag responsable ang tanan sa ila mga desisyon kag aksyon.
