Nagapati ang Human Rights Lawyer nga ang importante nga ebidensya amo deklarasyon mismo ni Vice President Sara Duterte sa iya Statement of Assets, Liabilities, and Net Worth (SALN) nga may interes siya sa GenCorp Industries.
Ini kasunod sang pagbuyagyag sang prosecution witness nga si PhilGEPS Division Chief Rendell Sopeña nga nakakuha ang GenCorp sang 49 ka kontrata halin sa nagkalain-lain nga ahensya sang gobyerno nga nagabalor sa P35.88 milyon samtang yara sa termino si Duterte bilang bise presidente.
Suno sa rekord sang PhilGEPS, 33 ka kontrata ang gin-award sang PhilHealth Region 11, 15 ka kontrata sang Davao City government kag isa ka kontrata halin sa OWWA Region 11.
Sa interview sang Bombo Radyo kay Atty. Jobert Llarde Pahilga, Human Rights Lawyer, iya ginpahayag nga apisar wala nakalista ang pangalan ni Duterte bilang stockholder sang GenCorp sa General Information Sheet ukon GIS ang iya mismo gin-deklara sa SALN nga may interest siya sa kompanya kag may mga transaksyon ini sa Davao City.
Suno pa natungdan, mahimo ini nga mangin basehan sang impeachment court sa pag-usisa kon may paglapas sa constitutional provision nga nagadumili sa isa ka opisyal sang gobyerno nga magpartisipar sa pila ka business interests samtang yara sa pwesto.
Samtang, ginpahayag naman sang depensa nga ang mga kontrata sang GenCorp sa Davao City gin-award sang tion nga indi na si Duterte ang mayor sang syudad, samtang nagapadayon ang presentasyon sang prosecution sang mga dokumento kag ebidensya sa impeachment trial.
