Nagapati ang isa ka human rights lawyer nga indi mahimo nga piliton si Vice President Sara Duterte nga magtestigo sa iya kaugalingon nga impeachment trial bangud sa idalum sang konstitosyon protektado ini sang right against self-incrimination.
Ini kasunod sang anunsyo sang prosecution panel nga luyag nila ipatawag si Duterte bilang witness sa impeachment trial.
Sa interview sang Bombo Radyo kay Atty. Jobert Pahilga, Human Rights Lawyer, iya ginpahayag nga isa ka “very novel” nga ideya ang pagpatawag sa akusado agud magtestigo batok sa iya kaugalingon.
Suno kay Pahilga, kun ang isa ka tawo gin-akusahan sang krimen, indi ini mahimo nga piliton nga maghatag sang testimonya nga mahimo magamit batok sa iya kaugalingon.
Nahibaluan nga ginatugyan na sang Malacañang sa mga senador-judges ang pagdesisyon kun tugutan ang prosecution panel nga mag-issue sang subpoena kag ipatawag si Vice President Sara Duterte bilang witness sa iya kaugalingon nga impeachment trial.
