Nagapati ang isa ka human rights lawyer nga may yara sang legal nga basehan ang Pilipinas sa idalom sang international law agud depensahan ang iya mga kinamatarong sa West Philippine Sea.
Ini kasunod sang panawagan ni Defense Secretary Gilberto Teodoro Jr. sa mga pungsod nga miyembro sang ASEAN kag sa ila mga kaupod sa dayalogo nga respetuhon ang United Nations Convention on the Law of the Sea ukon UNCLOS.
Sa interview sang Bombo Radyo kay Atty. Jobert Llarde Pahilga, isa ka human rights lawyer, iya ginpahayag nga ang UNCLOS isa ka international law nga nagatukod sang mga pagsulundan parte sa paggamit kag pagdumala sang kadagatan sang nagkalain-lain nga pungsod.
Suno kay Pahilga, sa idalom sang UNCLOS, ang kada pungsod nga may baybayon may yara sang 200 nautical miles nga Exclusive Economic Zone (EEZ) halin sa iya baseline, kun sa diin may eksklusibo ini nga kinamatarong sa paggamit kag pagdumala sang natural nga mga manggad sa amo nga katubigan.
Nagalaum naman ang natungdan nga untaton na sang China ang ginapahayag nga pagpangharas sa mga mangingisda kag mga katapo sang Philippine Coast Guard (PCG).
