ROXAS CITY – Luyag sang 20 anyos nga soltero nga mahatagan sang hustisya ang ginhimo nga kababuyan sang iya sang kapareho man sini nga lalaki sa sulod sang isa ka planta sa siyudad sang Roxas.
Mahibaluan nga sadtong Hulyo 6 pa natabo ang ginhimo nga pagpanghimulos sa biktima nga si alyas Marlon apang subong gid lamang ini nagpangisog nga magpalapit sa mga otoridad agud magreklamo.
Suno sa biktima, luyag sini nga madakpan ang suspek nga si alyas Rico kag bayaran sa sulod sang karsel ang ginhimo sa iya.
Base sa panaysayon sang biktima nga sang iya kuntani idul-ong pauli ang suspek matapos sila nag-inom, gindala siya sini sa ginatrabahuan ni Rico nga planta.
Didto kag ginpahublas ini, kag ginsulod pa sang suspek ang iya kinatawo sa alatrason sang biktima.
Halos apat ka oras suno sa biktima siya ginbalik-balik nga himuslan sang suspek.
Madugay nga gintago sang biktima ang nasambit nga hitabo bangud man sang kahadlok kasunod sang pagpahog sa iya sang suspek.
Apang nagkaisog ini nga magdangop sa mga natungdan bangud sang tuman nga kalain sang buot bangud sang kababuyan nga ginhimo sa iya.
Ginapanindugan sang biktima nga isa siya ka ‘straight’ nga lalaki kag wala sini ginalauman matubsan pa siya sang suspek nga himuslan.
