Arestado ang isa ka lalaki nga ginakabig High Value Individual (HVI) sa ginkasa nga search warrant operation sang mga kapulisan sa Barangay Casanayan, Pilar, Capiz.
Ang arestado amo si alyas Eldie, 40 anyos kag residente sang nasambit nga lugar.
Sa impormasyon nga nakuha sang Bombo Radyo nagikan sa Pilar Municipal Police Station, ginpahayag nga nakuha sa paghinakop sang arestado ang 10 ka mga transparent sealed sachet nga may sulod sang ginapatihan shabu, duha ka mga big size sachet, pito ka mga small sachet nga may sulod sang ginapatihan marijuana, kag isa ka unit sang improvised 12gauge Brake Five Shot Gun.
Samtang, nagdangat naman sa mas ukon menos P476,000 ang Standard Drug Price sang nasambit nga ginapatihan shabu, kag may kabug-aton 30 gramos naman ang narekober nga ginasuspetsahan marijuana nga may estimated market value nga P3,600.
Kaso sa paglapas sa Republic Act 9165 ukon “Comprehensive Dangerous Drugs Act of 2002” kag Republic Act 10591 ukon “Comprehensive Firearms and Ammunition Regulation Act’, ang pagapangatubangon ni alyas “Eldie.”
Sa karon yara na ini sa kustodiya sang Pilar Municipal Police Station para sa nagakaigo nga disposisyon.
