SAN JOSE, Roxas City – Arestado ang isa ka High Value Individual “HVI”, sa ginpatigayon nga drug buy-bust operation sa matapos nabaklan ini sang police poseur buyer sang 1 ka plastic nga sachet sang shabu nga nagabalor sang P20,000 bilang buy-bust money sa Angel Ville, Barangay San Jose, Roxas City.
Ang suspek amo si alyas Buraging, 35-anyos, kag residente sang nasambit nga lugar.
Sa interview sang Bombo Radyo kay Police Captain Dennis C Losbañes, Team Leader sang Regional Police Drug Enforcement Unit 6 “RPDEU6”, iya ginpahayag nga nga naglab-ot sa duha tubtob tatlo ka semana ang ila preparasyon, lakip ang casing, surveillance kag pag-validate sang impormasyon, antes natigayon ang operasyon.
Suno kay Losbañes madugay na nga ginamonitor sang mga operatiba si alyas Buraging bangud sa ginapatihan nga pag-engage sini sa iligal nga droga kun sa diin naglab-ot sa kapin 150 ka gramos ang nakumpiskar nga ginapatihan shabu, nga may Standard Drug Price “SDP”, nga P1,020,000 million.
Pahayag pa niya ginahulat man ang resulta sang drug test agud mahibaluan kon nagagamit man siya sang iligal nga droga, samtang padayon man ang ila pag-imbestigar agud mahibaluan ang posible nga ginahalinan sang iligal nga droga, apang indi anay nila mahimo nga i-publiko ang identidad sang mga ginapatihan nga source bangud mahimo ini makaapekto sa masunod nga mga operasyon.
Ginpangabay man sang natungdan sa publiko nga magpadayon sa pagkooperar sa kapulisan kag ginpaandaman ang mga nagabaligya kag nagagamit sang iligal nga droga nga padayon ang ila oprasyon batok sa mga drug personality.
Sa karon, nahibaluan nga yara na sa kustodiya sang Roxas City Police Station ang suspek kag ginapreparar ang kaso batok sa iya bangud sa paglapas sa Republic Act 9165 ukon Comprehensive Dangerous Drugs Act of 2002.










