SAN RAMON, Pilar, Capiz – Arestado ang isa ka High-Value Individual “HVI”, matapos ipatuman sang mga kapulisan ang search warrant operation sa Sitio Bat-os, Barangay San Ramon, Pilar, Capiz.
Matandaan nga natabo ang madinalag-on nga operasyon September 29, 11:30 sang aga.
Ginkilala ang subject person sakay alias Bambi, 43-anyos, HVI kag residente sang nasambit nga lugar.
Sa interview sang Bombo Radyo kay Police Captain Achilles Fangco Jr., Officer in Charge sang Pilar Municipal Police Station, iya ginpahayag nga lakip sa nakuha sa iya ang isa 1 ka unit sang caliber 38 revolver, 3 ka live ammunition 12-gauge, kag 9 ka sachet sang ginapatihan nga suspected shabu nga may kabug-aton sang 60 grams kag ginabulubanta nga nagabalor naman sang P408,000.00.
Suno kay Fangco nagbalibad man nga mag perma ang persona sa mga nakumpiskar bilang ibidensya nga nakuha sa iya.
Samtang paglapas naman sa Republic Act “RA” No. 9165 ukon Comprehensive Dangerous Drugs Act of 2002 kag Republic Act “RA” No. 10591 ukon Comprehensive Firearms and Ammunition Regulation Act.
Sa karon, yara na sa kustodiya sang Pilar Municipal Police Station si alias Bambi kag natalana nga para sa nagakaigo nga proseso kag pagsaka sang nagakaigo nga kaso.
