Ginaselebrar subong nga bulan ang Hypertension Awareness Month agud mapadako ang kampanya kontra hypertension ukon high blood pressure nga ginakabig isa sa pinakadelikado nga masakit nga mahimo magresulta sa stroke, atake sa tagipusuon kag kidney failure.
Sa intervire sang Bombo RAdyo kay Dr. Maria Saria De Tomas, Medical Officer III sang Tapaz District Hospital, iya ginpahayag nga ang hypertension amo ang pagsaka sang presyon sang dugo nga mahimo wala sang ginabatyag nga sintomas gani ginatawag ini nga “silent killer.”
Suno kay De tomas, lakip sa mga risk factors amo ang sobra nga pagkaon sang maalat, kakulang sa ehersisyo, pagpanigarilyo, pag-inom sang makahulubog nga ilimnon, kag stress.
Pahayag pa sini, delikado ang hypertension bangud mahimo ini magtuga sang stroke, sakit sa tagipusuon kag iban pa nga komplikasyon kon indi matatapan.
Agud malikawan ini, ginarekomendar ang masustansya sang pagkaon, regular nga ehersisyo, paglikaw sa sigarilyo kag ilimnon, kag regular nga pagpacheck-up sang blood pressure.
Dugang pa sang natungdan, importante man ang bulig sang pamilya pinaagi sa pagsuporta sa healthy lifestyle kag pagmonitor sang pag-inom sang maintenance medicines sang ila himata.
