Nagpagwa sang pahayag ang actor nga si Ian de Leon bilang sabat sa mga alegasyon sang iya utod nga si Lotlot de Leon angot sa ginaalegar indi pag-intindihanay sa tunga sang ila pamilya bangud sa palanublion sang ila nagtaliwan nga iloy nga si Nora Aunor.
Ginpanginwala ni Ian ang pila ka mga akusasyon, lakip na ang indi pagpahibalo sa iya mga utod nahanungod sa plano nga magtukod sang isa ka korporasyon para sa legasiya sang ila iloy.
Ginpanindugan sini nga dapat anay ma-finalize ang mga legal documents antes ini ma-move forward.
Gin-athag man sini nga indi siya nagapamatuk sa pagtukod sang foundation para sa ila iloy, apang dapat unahon ang nagakaigo nga proseso.
Nag-apela man si Ian nga untaton ang paglapta sang indi matuod nga impormasyon kag nagpanindugan nga luyag lamang niya ang patas kag matawhay nga pagtunga sang anuman nga palanublion.
