Nagapati ang IBON Foundation nga ginaabuso sang mga yara sa poder ang sistema sang political dynasty nga amo ang nagahatag sang mas daku nga oportunidad sa mga pamilya nga mapabilin sa gobyerno.
Ini kasunod sang mando sang Supreme Court sa Kongreso nga ipasa sa labing madali nga panahon ang Anti-Political Dynasty Law kalakip ang pagtumod sa depinisyon sang political dynasty kag sakop sang pagdumili.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga ginadumilian sang Saligang Batas ang political dynasty kag kinahanglan ini solusyunan sang gobyerno.
Suno kay Africa, ang padayon nga pagdominar sang pila ka pamilya sa politika nagapakita sang pag-abuso sa gahum kag nagapabudlay sa ordinaryo nga mga Pilipino nga makasulod sa serbisyo publiko.
Dugang pa sini, samtang nagapadayon ang political dynasty, posible man nga magpadayon ang pag-antus sang mga Pilipino bangod limitado ang oportunidad para sa iban nga lider nga magserbisyo sa gobyerno.
