Nagapati ang IBON Foundation nga indi ang interest rate ang nagakaigo nga solusyon sa pagluya sang piso matapos nagrekord ini sang bag-o nga pinakamahuyang nga balor nga masobra P63 batok sa US dollar.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga isa sa mga rason sang pagnubo sang balor sang piso amo ang kaluya sang lokal nga industriya kag ang kakulang sang kinitaan sang pungsod sa dolyar.
Suno kay Africa, kinahanglan nga mapabakod ang lokal nga industriya kag mapauswag ang ekonomiya agud madugangan ang kinitaan sang pungsod sa dolyar.
Dugang pa sang natungdan, ang pagluya sang piso nagapabudlay sa ordinaryo nga mga Pilipino bangud mahimo nga magmahal ang mga imported nga produkto kag iban pa nga balaklon.
