Nagapati ang IBON Foundation nga mabug-at ang mga ebidensya batok kay Sara Duterte agud nga ma-impeach ini.
Sa interview sang Bombo Radyo kay Sonny Africa, Executive Director sang Ibon Foundation, iya ginpahayag nga base sa apat ka beses nga pagpatigayon sang impeachment proceedings, nakitaan sang probable cause ang tatlo ka mga alegasyon batok sa bise presidente.
Una, ang ginaalegar nga misused of public funds sang Office of the Vice President kag Department of Education, kun sa diin ginbuyagyag sang self-proclaimed bagman nga si Ramil Madriaga ang P125 million nga confidential funds nga gin-ubos kuno sa sulod sang 24 oras.
Ikaduha, ang gin alegar nga ill-gotten wealth ni Duterte kag sang iya nga bana nga si Manases Carpio, bangud sa pila ka mga “suspicious transactions” sa ila bank accounts kag ang indi husto nga pagdeklara sang ila Statement of Assets, Liabilities, and Net Worth (SALN).
Ikatatlo, amo ang gin alegar nga pagpamahog ni Duterte kay Ferdinand Marcos Jr., pati na sa pamilya sini kag kay Martin Romualdez.
Pahayag pa ni Africa, daku ang tsansa nga makakuha sang isa ka katlo ukon 103 ka boto sa Kamara agud mapasaka sa Senado ang impeachment case.
Nagalaum man ang IBON Foundation nga makuha ang nagakaigo nga hustisya kag mabalik ang pondo nga dapat para sa mga pumuluyo.
